Good Omens: Crowley

Moi boas a todos e a todas!!!

Hoxe veño a falarvos dun personaxe que me encanta dunha serie que vin fai moi pouquiño: Crowley, de Good Omens. Estou segura de que calquera que vise a serie ou lese o libro (que espero poder ler pronto) entenderá por que necesitaba escribir unha entrada sobre el. E como quero animarvos a que vos metades nesta marabilla de historia, a miña intención é que non haxa absolutamente ningún spoiler. Así que, adiante!

Antes de nada, por que Crowley? A verdade é que non sabería escoller unha soa cousa que conteste a esa pregunta. Simplemente, porque é el. Porque ten unha personalidade tan súa que é imposible pasalo por alto. Porque é capaz de facer inolvidable algo tan simple como regar as plantas.

Empezarei falando da miña escena favorita (repito, sen spoilers, que ademais é algo que ocorre a finais do penúltimo capítulo e principios do último. Quen a vise, saberá perfectamente a cal me refiro). E é que non hai ninguén que faga unha entrada coma Crowley!! No mellor momento, coa mellor música e co mellor coche (por suposto que co mellor coche). Épico. Teño que dicir que chorei coa risa nese momento (e é aínda máis gracioso tendo en conta que acabou como acabou pola súa culpa).

En realidade, calquera escena co coche é imprescindible, porque forme parte del coma un rasgo máis da súa personalidade (e o mesmo coas gafas de sol). E non son as únicas! Non podo dicir todas as escenas que me gustaron, porque vos estaría contando toda a serie, pero si podo afirmar que vale a pena dende a súa canción taaan doce do primeiro capítulo ata o seu baño do último.

E máis alá do personaxe, o actor. David Tennant demostrou o seu talento dándolle vida a Crowley. Ata agora, antes de ver Good Omens, só o vira como Barty Crouch Jr, en “Harry Potter e o Cáliz de Fogo”, e quedoume claro, só con eses dous papeis, que o quero ver na pel de moitos máis personaxes, que serán, seguro, igual de inesquecibles.

Graciñas por ler!!

Imaxe de www.ebay.com